Тұрғын үй құрылысының операторы болып табылатын «Қазақстан Тұрғын үй Компаниясы» жалғыз акционер – «Бәйтерек» холдингіне төленетін дивидендтердің мөлшерін 8,6 есеге ұлғайтты, Бұл Қазақстан қор биржасының (KASE) сайтында орналастырылған хабарламадан мәлім болды.
2022 жылдың қорытындысы бойынша ҚТК 31,2 млрд теңге немесе бір акцияға 1773,9 теңге төлейді. Өткен жылы төлемдер 3,6 млрд теңгені құрады. Төлемдер 27 тамыздан кешіктірілмей жүргізілуі тиіс.
2022 жылы ҚТК таза табысы да 2021 жылғы көрсеткіштен 8,6 есе асып, 44,7 млрд теңгеге жетті. Осылайша, «Бәйтерекке» кірістің 69,8% төленеді. Компанияның өзінде қалған бөлігі инвестициялық және операциялық қызметті қолдауға және қаржылық тұрақтылықты қамтамасыз етуге бағытталатынын айтқан болатын.
ҚТК 2021 жылы «Бәйтеректің» үш еншілес құрылымы біріктірілгеннен кейін құрылды: «Бәйтерек Девелопмент», «Тұрғын үй құрылысына кепілдік беру қоры» және «Қазақстан ипотекалық компаниясы». ҚТК қызметінің басты бағыттары: сатып ала отырып жалға берілетін тұрғын үйді сату, ипотеканы беретін банктерге пайыздық мөлшерлемені субсидиялау және кейіннен ипотекалық облигациялар шығару арқылы оларды секьюритилендіру арқылы банктерден ипотекалық кредиттерді сатып алу.
Version for visually impaired