Бұл – Хромтауда компанияның тұрғын үй бағдарламасы бойынша салынған осымен оныншы үй. Бағдарлама шарттарының арқасында кеншілер өздері қалаған шаршы метрді бастапқы жарнасыз және ең төменгі пайыздық мөлшерлемемен сатып алды.

– Комбинатқа жұмысқа орналасқан соң, бірден алдыма мақсат қойып, тұрғын үй бағдарламасы бойынша кезекке тұрдым, – деп қуанышымен бөлісті теміржол цехының жүк тиеушісі Сәндіғали Төремқұлов. – Төрт қыз тәрбиелеп отырған жалғызбасты әкемін.  Үлкен қызым – студент, кенжем сегіз жаста. Бұған дейін ата-анамның үйінде тұрдық. Балаларым қазір менен де бақытты екенін айтып жүр.

Дөң тау-кен байыту комбинатының қызметкерлері ERG басшылығы мен «Қазақстан тұрғын үй компаниясы» АҚ арасында жасалған келісімшарт бойынша пәтерлеріне ең төменгі пайыздық мөлшерлемемен (3,1%) қол жеткізген.

Жаңа заманауи бес қабатты үйдегі пәтерлердің көбі екі бөлмелі. Бұл жастар үшін ыңғайлы болса, көпбалалы отбасыларға үш бөлмелі пәтерлер де бар. Барлық пәтерлер толығымен дайын күйінде тапсырылды. Аулада балалар ойын алаңы, теннис үстелі мен әткеншектер, кір кептіру кешені орнатылған. Мердігер компания жақын арада ауланы абаттандыру, қосымша жарықтандыру жұмыстарын жүргізіп, су ағызу жүйесін салып беретінін айтты.

Салтанатты кілт табыстау шарасында жаңа үй иелеріне компанияның кәсіподақ ұйымының атынан қысқатолқынды пештер мен тәтті тарту және естелік сыйлықтар табысталды.

–  Ең бастысы, әріптестеріміз баспаналарын қолжетімді бағада алды. Өз шаңырағыңның болуы балалы болғаннан кейінгі екінші бақыт деп ойлаймын, — деді «Қазхром»ТҰК» АҚ бас директоры Сергей Прокопьев. – ERG-дің әлеуметтік бағытының арқасында қызметкерлеріміздің өмірін жайлы әрі бақытты ете алатынымызға  қуаныштымын. Жаңа үйлеріңізде жаңа бақытқа кенеліп, балаларыңыз тек қуанышта өссін!

Дөң тау-кен байыту комбинатының директоры Нұрлан Саринжипов компанияның тұрғын үй бағдарламасы жүзеге асырылғаннан бері комбинаттың 500-ге жуық отбасы жеке баспаналарына қол жеткізгенін атап өтті. Үйлі болғандар қатарында «Қазхромның»  негізгі мамандық иелері, тапшы мамандық өкілдері, болашағы зор жас қызметкерлер мен көпбалалы отбасылар бар.

Осыдан бір апта бұрын «Қазхром» ТҰК» АҚ филиалдарының бірі – Ақсу ферроқорытпа зауытының жұмысшылары да пәтер иесі атанып, қоныстойларын тойлаған болатын. Компания Павлодар облысындағы металлургтер қаласында жетінші үйді салып берген.

Дереккөз: https://aikyn.kz/266933/baspanaly-bolyp—k-uanyshk-a-kenelgen-shahterler